كتير من الناس بيتفاجئوا أحيانًا وهم بيسحبوا فلوس من ماكينة ATM إن الكارت مش بيخرج، وده بيحطهم في موقف محير: يستنوا قدام الماكينة؟ يمشوا؟ ولا يتصرفوا إزاي؟

مع التوسع الكبير في استخدام التكنولوجيا الرقمية في الحياة اليومية، بقت الخدمات البنكية جزء لا يتجزأ من حياتنا، خصوصًا التعامل بكروت الفيزا والسحب من ماكينات ATM، لكن رغم التطور ده، لسه في بعض المشكلات اللي ممكن تقابل العملاء، زي احتجاز الكارت داخل الماكينة.

ليه الماكينة ممكن تسحب الكارت ومترجعوش؟

في كذا سبب ممكن يخلي ماكينة الـATM ترفض ترجع الكارت:
- إدخال الرقم السري بطريقة خاطئة أكتر من مرة.
- إن الكارت يكون منتهي الصلاحية.
- وجود عطل أو خلل فني في الماكينة نفسها.

تعمل إيه لو كارتك اتسحب؟

لو حصل وسحب كارت الفيزا، أول خطوة لازم تعملها هي التواصل فورًا مع خدمة عملاء البنك اللي أصدر الكارت، وتبلغهم بالمشكلة، هيطلبوا منك شوية تفاصيل زي:
- وقت حدوث المشكلة.
- عنوان أو موقع ماكينة الصراف اللي كنت بتستخدمها.

لو الماكينة تابعة لنفس البنك اللي مطلعلك الكارت، ممكن تستلم كارتك في اليوم التالي مباشرة. أما لو الماكينة تبع بنك تاني، فممكن توصل بطاقتك خلال أسبوع كحد أقصى.

إزاي تتجنب المشكلة دي؟

البنوك دايمًا بتوجه نصائح مهمة للعملاء علشان يحافظوا على بطاقاتهم، وأهمها:

- إدخال الرقم السري بعناية وتجنب تكرار المحاولات الخاطئة.
- التأكد من صلاحية الكارت قبل الاستخدام.
- استخدام ماكينات الصراف الآلي التابعة للبنك المصدر للكارت قدر الإمكان.
- عدم ترك الكارت جوه الماكينة لفترة طويلة بعد الانتهاء من المعاملة.
- إلغاء المعاملة فورًا لو لاحظت إن الماكينة بطيئة أو فيها مشكلة قبل ما تدخل الرقم السري.