النهاردة هنعمل مع بعض وصفة من الحلويات اللي بنعشقها كلنا  جاتوه الشوكولاتة، بطبقات ناعمة وطعم خرافي الوصفة دي مش بس سهلة، دي كمان سريعة، وبتطلع دايمًا مظبوطة من أول مرة.

المكوّنات:

للكيكة:
1 كوب زيت

1 كوب سكر

½ كوب كاكاو خام (من غير سكر)

1 كوب حليب

2 بيضة بدرجة حرارة الغرفة

1 ملعقة كبيرة فانيليا

1 كوب دقيق

1 ملعقة كبيرة بيكنج بودر

رشة ملح

للكريمة (الموس):

1 كوب كريم شانتيه بودرة

½ كوب سكر بودرة (اختياري حسب المذاق)

1 كوب مية ساقعة أو لبن ساقع

2 ملعقة كبيرة كاكاو خام (اختياري لو عايزة الكريمة تبقى شوكولاتة)

للصوص:

المتبقي من خليط الكاكاو والسكر اللي في الأول

شوية حليب أو مية لتخفيف القوام حسب الرغبة

طريقة التحضير:

أولاً: نعمل الكيكة
في الخلاط، ضيفي الزيت + السكر + الكاكاو + الحليب، واضربيهم كويس لحد ما يبقى الخليط ناعم.

شيلي منه حوالي نص كوب علشان نستخدمه بعدين كصوص.

ضيفي البيض والفانيليا على باقي الخليط في الخلاط، واضربي كويس.

في بولة، اخلطي الدقيق + البيكنج بودر + رشة الملح.

ضيفي الخليط السائل عليهم، وقلّبي كويس بإيدك أو بمضرب يدوي لحد ما كل حاجة تندمج.

صبي الخليط في صينية مقاس 22 مدهونة ومبطنة بورق زبدة، ودخليها فرن سخن 180 درجة لمدة 20-25 دقيقة.

لما تستوي، سيبيها تبرد تمامًا.

ثانياً: نعمل الكريمة (الموس)

في بولة، حطي بودرة الكريم شانتيه + السكر + المية أو اللبن الساقع.

اضربيهم بمضرب كهربا أو يدوي لحد ما تبقى كريمة متماسكة وهشة.

لو عايزاها شوكولاتة، زودي الكاكاو الخام واضربي تاني.

ثالثاً: نجهز الصوص

خدي الخليط اللي شلتيه من الخلاط في الأول.

لو تقيل شوية، خففيه بشوية حليب أو مية.

استخدميه بعد ما يبرد فوق الكريمة.

رابعاً: التجميع والتقديم

بعد ما الكيكة تبرد، حطي طبقة من الكريمة فوقها وساويها.

دخليها التلاجة شوية تمسك نفسها.

بعدها صبّي الصوص فوق الكريمة، ووزعيه كويس.

دخلي الجاتوه التلاجة تاني على الأقل ساعة، أو الفريزر 10 دقايق لو مستعجلة.

قطعيه زي الكاتوه أو مربعات، وقدميه.