الزلابية من الحلويات المفضلة عند ناس كتير، لأنها طعمها حلو وسهلة جداً في التحضير، وكمان ممكن تضيفي عليها نكهات مختلفة علشان تدي طعم مميز، علشان كده، كتير من الستات بيحبوا يعملوها في البيت بدل ما يشتروا من المحلات.

وفي الوصفة دي، هنعرفكِ طريقة عمل الزلابية في البيت بأسعار اقتصادية، زي ما بتعملها المحلات بالظبط، على طريقةالشيف نجلاء الشرشابي.

المكونات:

2 كوب دقيق (ممكن أي نوع دقيق عادي).
ملعقة خميرة فورية.
ملعقة نشا.
ملعقة صغيرة سكر.
350 مل ماء دافئ.
رشة ملح.
ربع ملعقة صغيرة فانيليا.

طريقة التحضير:

- في طبق، حطي شوية ماء دافئ مع السكر والخميرة، وبعدين ضيفي عليهم 3 معالق دقيق، سيبيهم لحد ما الخليط يخمر حوالي 5 دقايق.
- في طبق تاني، حطي الدقيق المتبقي، النشا، الملح والفانيليا، وبعدين ضيفي عليهم الخليط اللي خمر.
- قلبي المكونات كويس، وغطي الطبق وسيبيه لحد ما يخمر حوالي نص ساعة.
- بعد النص ساعة، قلبي الخليط تاني علشان تطلعي الهواء اللي فيه.
- سخني زيت في مقلاة على النار، وباستخدام معلقة صغيرة، خدي شوية من الخليط وشكليه دوائر صغيرة وحطيهم في الزيت السخن لحد ما يبقوا لونهم دهبي.
- لما الزلابية تبقى لونها دهبي، طلعيها وحطيها في شربات بارد تقيل، أو ممكن تضيفي عليها أي صوص تحبيه زي صوص الشوكولاتة البيضاء، أو صوص الحليب، أو كريمة الفستق، أو حتى مكسرات لو تحبي.