الأرز باللبن من الحلويات اللي دايمًا ليها مكانة في قلب كل مصري، سهل يتعمل في البيت، ومكوناته على طول موجودة، وطعمه بيدفي في الشتا ويفرش في الصيف، تعالوا نعرف الطريقة خطوة بخطوة علي طريقة الشيف نجلاء الشرشابي.

مقادير الأرز باللبن:

نص كباية رز مصري مغسول كويس
4 كبايات لبن كامل الدسم
نص كباية سكر (أو حسب ما بتحب الحلاوة)
معلقة كبيرة نشا (لو عايز قوام تقيل شوية)
رشة ملح خفيفة
فانيليا أو شوية مية زهر للريحة والطعم
قرفة مطحونة أو شوية مكسرات للوش.

طريقة التحضير:

هتغسل الرز كويس جدًا، وبعد كده تسلقه في شوية مية لحد ما يستوي نص سوا.
لو فاضل مية بعد السلق، صفيها، وبعدين حط الرز في حلة فيها اللبن.
شغّل النار على وسط وقلّب لحد ما اللبن يبدأ يغلي، وبعدين وطي النار وخلي الرز يكمل سواه جوا اللبن، ومع التقليب هتلاقيه بيبدأ يغلظ وياخد قوام كريمي.


في طبق صغير، دوب النشا في شوية لبن بارد، وبعدين ضيفهم بالتدريج على الحلة مع تقليب مستمر عشان ميتكتلش.
لما القوام يبقى زي ما بتحب، ضيف السكر والفانيليا أو مية الزهر وقلّب كويس لحد السكر ما يدوب تمامًا.
سيب الخليط على نار هادية شوية كمان (من 5 لـ10 دقايق) وبعدين طفي عليه.
صب الأرز باللبن في أطباق أو طواجن، وسيبه يهدى شوية، وبعد كده زيّنه برشة قرفة أو شوية مكسرات حسب ذوقك.