الكلمة الحلوة مطر تسقي روح من يسمعها حتى لو كانت كلمة بسيطة بالنسبة لك، لكن أثرها يظل باقٍ طال العمر، وقد قال  تعالى" وَقُولُوا لِلنَّاسِ حُسْناً ".

الكلمة الحلوة توصلك لقلب من أمامكَ أسرع وتجعل حبل الود موصول، وتزود المحبة، والمعزة، والثقة بينك وبين غيرك، الكلمة القبيحة مثل السيف تقطع في النفس بالبطيء أن تحس أنت بها حتى لو على سبيل الهزار.


كلنا نحتاج إلى الكلام الحلو الذي يزيد ثقتنا في نفسنا، ابنك يحتاج إلى الكلمة الحلوة التي تشجعه وتزود له ثقته في نفسه لا لتهدمها لمجرد أن صاحبه حصل على درجة أعلى منه في اختبار، فتحكم عليه بالفشل ويظل إحساس الفشل يلازمه طوال حياته رغم أنه في الحقيقة ليس فاشلًا، هو كان يحتاج إلى كلمة حلوة ليس أكثر، كان يود أن تطبِّبه ويحصل على الدرجة النهائية المرة القادمة، أتود أن يشرفكَ ابنك أو ابنتك في أي مكان! 

عليك بالكلمة الحلوة وأن تلغي كلمة فشل  من قاموس حياتك، كن بر الأمان لهم لا بر الخوف والقلق والإحباط الكلمة الحلوة هي التي تشجعهم؛ لكي يصبحوا أحسن من كل من قارنتهم بهم.


-على بلاطة كده ومن غير لف ودوران كتير مش عايزة أشوف وشك ده تاني ايه القرف ده انتي بنت انتي؟
ايه الحبوب والسواد اللي تحت عينك ده ايه ده ما تروحي تكشفي بقي هو أنا ايه ذنبي أتخض من المنظر ده كل يوم منك في الشغل أنا ليا كلام مع المدير لما يجي ويا أنا يا انتي في المكان ما أهو صحيح الشركة لمت اللي يسوا واللي ميسواش أنا زهقت استني وبعدين ايه القرف اللي أنتي لابساه ده أنتي معندكيش ذوق أبدًا كده في طريقة لبسك، لحد امتى هيفضل ذوقك مبهدل ومبتعرفيش تلبسي كده.

حسام:
 _ في ايه يا رحمة ما تستهدي بالله شوية كده وروقي، ده أنتي لو قاصدة تخلي سلمي تقوم ترمي نفسها من الشباك مش هتتكلمي كده وبعدين انتي مالك انتي بلبسها ولا بشكلها ايه الأسلوب ده مش ذنب سلمى زميلتك في الشغل إن ذوقها في اللبس مبيعجبش حضرتك، وعمر ما كان أسلوب كلامك ده طريقة تخلي اللي قدامك يفكر في التغيير من نفسه، ده لو كان فعلًا فيه حاجة تستاهل التغيير وبعدين ما تخليكي في حالك شوية مش يمكن رحمة لبسها مناسب ليها ولظروفها ولسنها ولا هي عشان مش حاطة مكياج ولابسة علي الموضة زي حضرتك يبقى يا حرام دي شكلها وحش ولبسها مقرف وبعدين يمكن هي شايفة إن لبسها المحترم أشيك لبس في الكون وبشرتها الغامقة جميلة وهادية مش عاملة ألوان الطيف السبعة في وشها.


-حتي لو مبهدل شوية يا شيخة أو ذوقه مش عاجبك مفيش طريقة أحلى من كده شوية تغيري بيها كلامك من غير ما تجرحيها أنتي فاكرة إن كلامك ده بيمر كده عادي ؟

تبقي غلطانة يا رحمة ده شوية الكلام اللي قولتيهم دول يمكن يخلو سلمي متخرجش تاني من البيت ولا تحاول تتكلم تاني مع حد جديد لأنك خذلتيها في نفسها وفي ثقتها ما هو كلامك الخايب ده ليها كل يوم أكيد هيقلل ثقتها من نفسها يا بنتي عارفة إن الكلمة الحلوة بتفرق كتير، ولا صحيح انتي هتعرفي منين بكلامك الدبش ده لكل اللي حواليكي.

رحمة سرحت قليلًا ورجعت لحسام:

_والله أنا ما أقصد ولا جه في بالي إن اللي قولته ده يمكن يجرحها أو يخليها تسيب الشغل بسببي أنا كنت عايزاها تغير من لبسها عشان تظهر في أحسن صورة مش أكتر والله أنا هروح أكلمها وأعتذر لها عن كل كلمة صدرت مني من غير قصد وعمري ما هجرح حد تاني بكلامي ولا هفكر أعلق ولا أعدل على لبس حد أو شكله وزي ما قلت يا حسام هو أنا مالي فعلًا أنا مليش دخل كل واحد يلبس اللي يريحه واللي يناسبه متزعلش مني انت كمان يا حسام وأنا عمري ما كنت هعمل كده ولا هفكر في اللي أنا قلته ده وأغير منه واجري أعتذر لسلمى غير بطريقة كلامك الحلو في توصيل المعلومة ليا حتي وأنا اللي غلطانه ومن النهاردة كلنا حلوين بالحبوب واللبس المحترم وعارف يا حسام أنا لو شلت المكياج ده هتلاقي السواد مالي عيني والحبوب أثرها في وشي أنا أسفة ليك ولسلمى الجميلة كلنا حلوين..


الكلام الحلو يفرق جدًا، قادر على أن يغيّر نفسيتك من شخص مُكتئب لشخص مُبهج، من شخص فاقد الأمل في الأشخاص لشخص لا يستطيع التوقف عن الكلام، يريد أن يصاحب هذا وذاك، الكلام الحلو يجعلك تبتسم بلا سبب  وطول اليوم واثق في نفسك وفي شكلك، الكلام الحلو يُطيب القلب، يفتح النَّفس، يجعل أفكارك إيجابية جدًا، لا تتوقف عن قول كلام حلو لأي شخص، حقيقي هناك فرق عندما ترى شخصًا يرتدي شيئًا جديدًا فتقول له _جميل_ وقتها سيحب ذاك الشيء، ويحب نفسه ويحبك أكثر، عندما ترى شخصًا عمل شيئًا مهما كان تافهًا بالنسبة لك  لمُجرد أن تقول له _عظيم_ سيفرق معه خصوصًا أن كلامك كان تقديرًا لتعبه فيها، لو لن  تقدر أن تساعد من  أمامك بأي شيء فـيكفي أن تحاول مساعدته معنويًا بكلام لطيف هناك أشخاص كثيرون انتحروا لمُجرد أنهم لم يجدوا من يسمعهم أو يحتويهم  بكلمة أو بحُضن، فـاترك أثرك في كل شخص ولو بكلمة حلوة وستفاجأ بشعور السعادة من غير سبب ستبقى سعيدًا وحدك دون أي موقف يستدعي ذلك،  سيجبر الله خاطرك بسبب أثرك الذي تركته فى قلب كل شخص، فها هو النبي _صلى الله عليه وسلم_ قال " الكلمة الطيبة صدقة "

هدير جلال _ محررة صحفية بموقع اجري نيوز الإخباري 

تابع موقع اجرى نيوز عبر تطبيق (جوجل نيوز) اضغط هــــــــنا

اجرى نيوز ، موقع إخباري  يقدم أهم الأحداث المحلية والعربية والعالمية وخدمات صحفية محترفة في الأخبار والاقتصاد والزراعة والعلوم والفنون والرياضة والمنوعات ، وهدفنا أن نصل لقرائنا الأعزاء بالخبر الأدق بما يليق بقواعد وقيم الأسرة المصرية.


لذلك نقدم لكم مجموعة كبيرة من الأخبار المتنوعة داخل الأقسام التالية، اخبار مصر، اخبار الزراعة، صناعة الدواجن، الثروة الحيوانية، بنوك واقتصاد، اجرى لايف، مقالات، منوعات، وخدمات مثل سعر الدولار، سعر الذهب، سعر الفضة، سعر اليورو، سعر العملات الأجنبية، سعر العملات المحلية.