سنين مرّت علينا وعلى ناس نحبهم، من غيرهم روحنا تُطفأ، نحس أننا ولا حاجة، نحيا مجهولين وسط ناس معلومين لا يشعرون بقيمتنا معهم رغم أنهم قد يكونون يفعلون كل شيء يُريحنا؛ لكننا لم نعد نستطيع التأقلم من جديد بعد فراق الغاليين.

نشعر بعد فقدان أحد نحبه بصدق أنه لم يعد هناك شيء أسوأ من ذلك، لا شيء حلو سيعود من جديد خصوصًا عندما يكون شخص اقتسمت معه عمرك كله ليس بضع سنوات، أعني عشرة ومحبة!.

من كم يوم ذهبت أجلب حاجة من محل شخص أعرفه من زمان جدًا، دكان العم سالم أشهر واحد في المنطقة معروف بخفة دمه، وضحكته التي لا تفارق وجهه دائمًا ما يناكف في الرائح والغادٍ، كل أولاد الحارة يحبونه وهو يعتبرهم كأولاده من فرط حبهم له؛ كانوا أول ما يعملوا العملة في البيت من هنا يجرون يختبؤون عنده من هنا لأنه كان مصدر الأمان لهم.

هنا :
_ازيك يا حج سالم
سالم :
_ازيك  يابنتي
هنا :
_ ايه ده في ايه يا حج؟ حضرتك بتعيط !
سالم:
_ لا يابتي مفيش حاجة قولي كنتي عايزة ايه؟
هنا :
_ لا لا أنا مش غريبة أنا زي بنتك أنا عمري ما جيت هنا غير والضحكة على وشي من كلامنا ، قولي في إيه؟ إيه الحجة مزعلاك ولا ايه ؟
سالم :
_عمرها ما عملتها..
هنا :
_طب مين طيب؟
سالم:
_هحكيلك يابنتي يمكن أهدي مع إني عارف إنه  مش هيحصل.
هنا  :
_أنا سامعة حضرتك...
سالم :
_من أسبوع الحجة فضلت تقولي خلي بالك من نفسك يا سالم،  اعرف مواعيد الدوا يا سالم ، أنا مش عيشالك يا سالم ...
كنت بخاف من كلامها يا بنتي والله، بخاف تسبني، بخاف أعيش لواحدي بعدها، كنت بتعمد أنسي الدوا عشان أشوف اهتمامها ليا وعتابها إني مش باخد الدوا..

من يومين قولت أحاول أفرحها، نزلت الصبح جبت فطار وعيش سخن مع إني تعبان يا بنتي بس هي غالية عليا أوي فا مفرقتش صحتي قد ما فرق إني أفرحها، وأنا راجع لاقيت محل ورد فاتح الصبح فيه بنوتة زيك كده ضحكتها جميلة فا اتشجعت ودخلت، قولت لها عايز وردة للحجة وأنا حاسس إنها ممكن تضحك عليا اكمنها راحت عليا، بس أدتني وردتين لونهم أبيض وقالتلي صباح الفل ففرحت أكتر  إن في ناس لسة بتقدر الحب...

روحت وفطرنا وأدتها الورد وحكيت لها عن البنت اللي لسة بتقدر الحب وفكرتها إني بحبها مهما العمر عدى و قعدنا نفتكر سنين من عمرنا عدت بحلوها ومرها، دي عِشرة 50 سنة يابنتي عشرة ضفيرة طويلة لحد سنان بتقع عشرة عمر فوق العمر دي عمري كله دي، عرفتها وعشت معاها أكتر من أهلي وصحابي، مليش غيرها بعد ربنا، قضينا اليوم كله كده ضحك و فرحة في عنيها، جت بليل قالت لي يلا ننام بدري عشان نصلي الفجر ..
جيت يابنتي أصحيها الفجر مش راضية تصحي!! مش راضية ترد عليّ.(صوت بكاء)
هنا :
_لا حول ولا قوة الا بالله ، اهدي بس يا حج خير والله...
(بكاء)


سالم :
_ مكانتش بترد عليا ده اللي وجعني، عمرها ما حصلت في حياتها، ساعتين بقنع نفسي إنها نايمة، مش عارف ومش قادر أصدق، حاجة ضربت قلبي كده مش عارف سببها، محستش غير وأنا بنادي على الجيران يلحقوني وصوتي مش طالع ومش قادر أجري، عقلي عجز فجأة إنه يحدد اتجاهي، لاقتني مرة واحدة بنادي من الشباك عشان حد يجي ...

جه الدكتور مع الجيران و قال لي البقاء لله، ساعتها عرفت إن خلاص روحي سافرت معاها، و عيني مش هتشوفها تاني، و ان الدوا خلاص ملوش لازمة، بقالي يومين الحزن بياكل في قلبي، بتمني ربنا ميطولش عليا واروح وراها لأنها واحشتني جدًا جدًا وحشني العمر اللي عدي ما بينا معاها وحشتني ذكرياتنا من أول نظرة لحد آخر نظرة في الموت. 

الخلاصة نحن  نحتاج إلى الحب جدًا في حياتنا سواء حب الأهل أو الأصحاب أو حتى حب الناس الذين لا نعرفهم: الحب دفء وأمان، الحب حياة ثانية، الحياة بالحب تجعل الدنيا تمشي حتى لو كانت مليئة هموم وبلايا .

تابع موقع اجرى نيوز عبر تطبيق (جوجل نيوز) اضغط هــــــــنا

اجرى نيوز ، موقع إخباري  يقدم أهم الأحداث المحلية والعربية والعالمية وخدمات صحفية محترفة في الأخبار والاقتصاد والزراعة والعلوم والفنون والرياضة والمنوعات ، وهدفنا أن نصل لقرائنا الأعزاء بالخبر الأدق بما يليق بقواعد وقيم الأسرة المصرية.

لذلك نقدم لكم مجموعة كبيرة من الأخبار المتنوعة داخل الأقسام التالية، اخبار مصر، اخبار الزراعة،صناعة دواجن ، الثروة الحيوانية، بنوك واقتصاد، اجرى لايف، مقالات، منوعات،  وخدمات مثل سعر الدولار، سعر الذهب، سعر الفضة، سعر اليورو، سعر العملات الأجنبية، سعر العملات المحلية.