أمطار وشبورة ونشاط للرياح ونهار دافئ وليل شديد البرودة، تتزامن مع آخر ليلة من ليالي الموالح السود، وبعدها ثم تبدأ الـ 10 ليالي الصوالح وبعدها تنتهي ليالي الأربعينية واللى متطابقة كما وصفها أجدادنا.


الاسبوع ده متوقع حالة ممطرة يمكن تصل لمناطق كتير من الجمهورية خاصة الدلتا كلها وشمال الصعيد ويمكن تصل إلى سوهاج (حسب توقعات النماذج).

تبدأ الحالة من فجر بكرة الاثنين وتستمر أيام الثلاثاء والاربعاء والخميس استمرار الحرارة مستقرة بلا تغيير بحيث تكون دافئة إلى دافئة جداً نهاراً وشديدة البرودة ليلاً ودي معناها فرق كبير بين حرارة الليل والنهار.

متوقع كمان شبورة مائية تصل لحد الضباب ايام الاتنين والثلاثاء والاربعاء فى معظم مناطق الوجه البحري، كمان فيه نشاط واضح للرياح في ايام متقطعة من الاسبوع على كل المناطق تقريباً.

اهم الاعتبارات والاحتياطات المطلوبة

الشكل ده من الجو ( تذبذب حراري وشبورة ورطوبة وامطار) هيقلل الامتصاص جداً جداً ( ومعروف هنتدخل ازاي).

 الجو ده بتاع امراض بامتياز ( على كل المحاصيل خاصة البطاطس والبصل والتوم والفراولة والكتان والخرشوف والطماطم والفلفل والفول والبسلة ( مبقاش محاصيل تاني ).

توصيات هامة:

مزارعين القمح والشعير والكتان وكل المحاصيل الشتوية (طويلة الموسم) الفترة دي اهم فترة في بناء محصول الموسم، لازم تتابع زرعك وتعرف احتياجاته ايه ( التوصيات كلها على الصفحة).

اللي هيزرع قمح اليومين دول ( بعد المواعيد المناسبة بكتير قوي ), يمكن نقع التقاوي فى محلول نترات البوتاسيوم وفوسفات احادى البوتاسيوم بنسبة 1.8% لكل منهما يؤدي الى تحسين الامتصاص فى الاجواء الباردة.


المحاصيل الأرضية زي البطاطس والبنجر والبصل والتوم المبكر دي فترة هامة جداً للتحجيم والترصين ومهم جداً جداً تحافظ عليهم من امراض الشتاء المزعجة ، وكمان تكثف إضافات البوتاسيوم في أي صورة متوفرة  والاهم تضبط الري واوعى التعطيش او التغريق.

البطاطس الصيفي اللى انزرعت بدري وكل الخضر يكون عالي الفسفور والبوتاسيوم فوسفيت ونترات الكالسيوم هو الأساس...

الطماطم اللى بتجمع التحجيم والتلوين هيضعف وعليكم بسترات او نترات أو اسيتات البوتاسيوم رشاً.


مزارعي الزيتون استعدو لضبط الموسم وخاصة الانتهاء تماماً من التقليم فاحتياجات البرودة ستكون فى مواعيدها ،ومتوقع موسم غزير التزهير .

زيادة تذبذبات الحرارة مع زيادة الرطوبة النسبية بسبب الشبورة والندى الكثيف, ودي لها علاقة كبيرة جدا بانتشار بعض الآفات الحشرية أو المرضية اللى ممكن تسبب ازعاج كتير للزرع:

حشرات المن على الفول والبطاطس الصيفي وغيرها.

التربس على البصل والكمون وصانعات الانفاق على طماطم تحت الانفاق وغيرها .

أمراض اللطعة الارجوانية على البصل والثوم

 اللفحة المتأخرة على البطاطس والطماطم 


 لفحة الساق الصمغية على الكنتالوب والبطيخ وخيار الانفاق والصوب خاصة فى الصعيد

 العفن الرمادي والعفن الطري على ثمار الفراولة وطماطم الصوب ... وغيرها.

وطبعاً الإجراءات الوقائية او العلاجية مهمة جدا خلال هذه الفترة.

محاصيل الفاكهة مستديمة الخضرة زي المانجو والنخيل والموالح والموز وغيرها, اتأثرت بالظروف الباردة ( حتى ولو محصلشي صقيع) ومحتاجه تفوق شوية عشان تستعد للموسم الجديد وطبعاً اهم بند هو حجم الكربوهيدرات المخزنة فى البراعم والقمم والدوابر وغيرهاة ودي وقت بناءها انتهى للاسف لكن مهم جداً اننا منخليش الشجرة تستهلكها فى الفاضي ( فى تنفس الظلام ) بالتالي أبدأ تغذية تدريجية يكون الازوت (السهل) هو الاساس يعني السماد المركب ( عشرينات او 19 رات والماب ) يتم اضافته بالتدريج وبلاش تماماً موضوع تطويل التصويم دي, وحاجات كتير هنقولها بعدين.



 التراكيب المحصولية خاصة الفاكهة المتساقطة (عنب، خوخ ، برقوق ، مشمش ، كمثرى ...الخ), فاحتياجات البرودة عامل مشجع للموسم ويتبقى ضبط وانضباط بداية الموسم خاصة مواعيد التقليم والرش وبداية التغذية.

الدكتور محمد فهيم ريس مركز المناخ الزراعى وزارة الزراعة