اللب السوبر او بطيخ اللب هقولك شويه معلومات كدا عزيزي المزارع عن اللب السوبر أو بطيخ اللب علشان لو هتزرعة السنادي لب تبقا لازم تأخذ بالك منهم :-

أنواع اللب السوبر

-الرومي وده مشهور في البحيرة 
-الشبح وده مشهور في كفر الشيخ
-والدرس وده مشهور في الشرقية
-اللوفي وده حبيبته بتشبه حبه اللوف 
-تزرع لب معامل بمبيد فطري ولا من البيت علطول بص بقا يا صديقي المزارع يفضل يفضل يفضل انك تزرع لب معامل مبيد فطري علشان نتلاشي حته الإصابة باعفان الجذور وبالتالي سرعه نمو وعدم وجود جور غائبه 
ولو مش فى امكانك انك تشتري وعاوز تزرع من البيت يبقا لازم تجيب مبيد فطري وتعامل بيه البذور قبل الزراعه ) 
ارشحالك ايه بقا من المبيدات الفطري الى تعامل بيها
_ ماكسيم  أو توبسين ( او اي مبيد فطري يحتوي على ثيفونات المثيل او هيمكسازول أو فوستيل الامونيوم )

موعد زراعته

بيتم زراعته بدايه من شهر إبريل و حتى منتصف شهر يونيو حسب المنطقة 
وافضل معاد ليه حسب الجو السنه دي من 20 ابريل حتي 20 مايو  . 

خدمة ما قبل الزراعة  

أولا: بيتم حرث الأرض سكتين وتسويتها 
ثانيا:  اضافه السماد البلدي بمعدل 8 - 10 متر للفدان 
ثالثا: اضافه سوبر ممكن نقول ٢ محبب و ٣ ناعم للفدان والزيادة مش بتزعل 
رابعا: بيتم اضافه شكارة سلفات نشادر وشكارة سلفات بوتاسيوم 
ثم يتم تخطيط الأرض وعمل المصاطب تكون متر او مترتين 
متر لو هتزرع على ريشه واحد 
مترين لو هتزرع على رشتين 

مسافة الزراعة 

بتكون من 30 ال 50 سم على حسب عاوز كام نبات في الجورة لو على 30 سم يبقا نبات واحد في الجورة لو على 50 سم يبقا نباتين في الجورة وبيتم زراعه من 2 ال 3 بذور في الجورة ( ثم يتم خفهم وانتخاب الباردة الأقوى وازاله باقي البادرات  .

وبعد عمليه الانتخاب يتم إعطاء أول ريه وهي ريه المحاياه
وتكون على عمر من 20 _25 يوم من الزراعه .
فى البوست القادم هقول لحضرتك تضيف اي من الاسمده مع الري وترش ايه بردك .
حاجه في غايه الاهميه لازم تاخد بالك منها 
-التلقيح فى اللب السوبر تلقيح خلطي بيتم عن طريق الحشرات وخصوصا النحل .
-ياعني ايه الكلام ده
بكل اختصار لو عاوز انتاج يصل معاك 
لـ 800 و 900 ك للفدان -__ يبقا لازم الأرض الى انت هتزرع فيها اللب تكون قريبه جدا لخلايا نحل او لو فى امكانك انك تجيب خليتين نحل لكل فدان يبقا عملت الصح 
-ويفضل ان تكون الأرض متزرعتش لب لمده ٣ سنوات فأكثر 
-طاب لو مش هتقدر تجيب
يبقا تجيب فراخ او بط ميت وتحطه حلوين الأرض بحيث يتم عمليه التلقيح بواسطه الذباب 
خد بالك عمليه التلقيح مهمه جدا جدا بالنسبالك كمزارع لب سوبر ليه علشان تحصل على بذور ممتلئه وجيده وده إلى هيحدد معاك القيمه التسويقيه المحصول فى الاخر .
فى البوستات القامه ان شاء الله هتابع معاكم الري والتسميد ومكافحه الأمراض
وأيضا الرش سواء رش مبيدات وغيرها .


المهندس/ حازم عبد الهادي  استشاري المحاصيل الحقلية.