فى شهر رمضان بتظهر قدامنا الحلويات الشهيرة زي الكنافة، القطايف، والبسبوسة، بالإضافة للاختراعات الجديدة اللي مليانة السوق، لكن الصراحة، شكل الحلويات دي لوحده ممكن يزيد الوزن بسبب كميات السكريات العالية فيها، الحلويات المركبة، اللي بتتكون من أكتر من نوع حلويات، بدأت تنتشر في الفترة الأخيرة، ودي مش بس بتأثر على الوزن، لكن كمان بتأثر على الصحة العامة.


ولكن خلينا نتكلم النهاردة عن الدايت مع الحلويات في رمضان، خصوصًا بعد الفطار، ازاي لو قدرت تسيطر على سفرة الفطار المليانه أكل من كل الأصناف، تقدر كمان تقاوم الحلويات بعد الفطار؟ في الحقيقة، مش محتاج تحرم نفسك من حاجة أو تقاوم، بس المهم إنك تقدر توازن.

إزاي ندمج الحلويات مع الدايت في رمضان؟

1- استشارة الطبيب:

أول حاجة لازم تعملها هي إنك تستشير طبيبك علشان تقدر تدخل الحلويات ضمن سعراتك الحرارية اليومية، كل جسم مختلف، والطبيب هو اللي يقدر يحدد الكمية المناسبة ليك.

2- خدعة بسيطة:

هناخد وجبة الإفطار اللي مليانة ألياف وبروتين وكربوهيدرات بشكل معتدل، وبعدها على طول ناخد أكتر نوع حلويات بنحبه، بس الكمية تكون مش كبيرة، تناول الحلويات بعد الوجبة الأساسية بيساعد على تقليل سرعة ارتفاع سكر الدم، وبالتالي بيساعد في تقليل تأثير الحلويات على الجسم.

3- استخدم أدوات صغيرة:

ممكن تستخدم شوكة صغيرة أو ملعقة صغيرة علشان تأخذ كميات أقل من الحلويات. ده هيساعدك تتحكم في الكمية اللي بتاكلها.

4- المضغ ببطء:

حاول تمضغ الحلويات لمدة أطول علشان تحس باللذة والرضا، وده هيساعدك تستمتع بها لفترة أطول مع كمية أقل.


الموضوع مش إنك تحرم نفسك من الحلويات أو ترفضها، لكن الأمر يتعلق بالاعتدال، إذا استطعت أن تتحكم في الكمية وتوازن بين الأطعمة المختلفة، هتقدر تستمتع بحلويات رمضان بدون ما تأثر على صحتك أو وزنك.

دكتور محمود شادي- اخصائي العلاج الطبيعي والتغذية العلاجية - جامعة 6 أكتوبر
- دكتور علاج طبيعي في ريكوفري سيتي للعلاج الطبيعي.
- دكتور العلاج الطبيعي بالقصر العيني سابقا.
- عضو الجمعية المصرية لتطوير التعليم الطبي المستمر.
- مؤسس أكاديمية PTPA للتعليم والتدريب في مجال العلاج الطبيعي.
- مؤسس VEGAT للتغذية العلاجية.