كتير من المرضى، بيتشخصوا إن عندهم قصور في الشريان التاجي، وبيحتاجوا يعملوا قسطرة استكشافية علشان نعرف المشكلة بالضبط ونحدد العلاج المناسب، اللي في الغالب بيكون توسيع بالبالون أو تركيب دعامات.
وأول ما يعرف كده، يروح لدكتور واتنين وثلاثة وعشرة لحد ما يقابل الدكتور اللي يقوله مفيش داعي للقسطرة، وفي الأول بيحس براحة. المشكلة الأكبر بقى إنه بيكمل حياته بنفس الطريقة، يدخن، والسكر عالي، والضغط مش متظبط.
والمشكلة الحقيقية إن في الأغلب، للأسف، بيشيل ده على نفسه لحد ما يروح المستشفى بعد ما يكون جاله ذبحة أو جلطة، ولو متلحقش في الوقت المناسب، يكون ضيع على نفسه فرصة إنه يتعالج صح من البداية.
وأحيانا بيلجأ يعمل القسطرة بعد كام سنة، وتكون الشرايين اتقفلت خالص ومفيش حل غير الجراحة.
من فضلك، لو الدكتور طلب منك قسطرة، متخفش، متهربش، ومضيعش فرصتك في إنك تعرف مشكلتك وتعالجها صح من الأول، خصوصًا إن نادرًا ما بتحصل مضاعفات في القسطرة التشخيصية.
ودمتم سالمين.
دكتور محمود سليمان - استشاري امراض القلب والقسطرة التداخلية.
