ونحن في أيام العشرة الأخيرة من طوبة ( أيام شديدة البرودة ليلاً مائلة للدفيء إلى دافئة نهاراً )..
#دخلنا_في_الجد، فعليا دخلنا في مرحلة مناخية مميزة ببعض الظروف واهمها:
زيادة الفرق بين درجات الحرارة بالنهار عن الليل او الفرق بين درجة حرارة الأيام.
زيادة حدة التقلبات المفاجئة في المناخ وخاصة درجات الحرارة من دافئ الي شديد البرودة .
زيادة الرطوبة الجوية وخاصة صباحاً وانخفاضها بعد الضهر ثم زيادتها ليلاً .
تذبذبات في سرعات الرياح واللي أحيانا محملة بالأتربة والرمال الدقيقة .
ده غير ان بعض الأشجار (طويلة موسم الانتاج) زي المانجو والزيتون والنخيل حدث او هيحصل لهم "تزهير مبكر" بغزارة وبدأ فعليا فى المانجو هيلحقها الزيتون ،والنخيل في الطريق ،وباقي المتساقطات المتأخرة وده يستدعي الحرص الشديد، اكرر الحرص الشديد ،لانه يتوقع ان تعود بعض الموجات الباردة واحيانا الصقيع أو الرياح "الساخنة" أكرر "الساخنة" وهتكون الأشجار دي فى مرحلة الاخصاب واحيانا بداية العقد والفترة دي حساسة جدا لاى تقلبات مناخية .
وده تأثيره أيه على الزراعات القائمة
أولاً من ناحية نمو النباتات
فده هيعتمد على عمر النباتات ونوعها طبعاً وعموما الظروف السابقة دي مفيدة نوعا ما في المحاصيل اللي في عمرها الأول لان امتصاص العناصر والماء بيزيد (نخلي بالنا بخصوص برنامج التسميد ونركز على الفسفور) .
اما النباتات اللي في منتصف عمرها فبيحصل تذبذب في الامتصاص وتعرضها لمشاكل نقص العناصر وخاصة الماغنسيوم والبوتاسيوم والزنك والمنجنيز وطبعا الكالسيوم واحيانا البورون والحديد .. وشدة النقص على حسب نوع التربة وملوحة مياه الري طبعاً .
أما النباتات في نهاية العمر فللاسف تقريبا بيتوقف امتصاص العناصر او بيكون بطيء نوعاً ما .. وده بيستلزم يكون لها برنامج تسميد "خاص" مش تقليدي .
ثانياً التأثير على الحشرات
وده المهم "والخطير" فالظروف دي هي استعجال لاستدعاء الجيل الاول لكثير من الحشرات او زيادة سرعة انتاج الأجيال وركزوا هنا شوية:
الجيل الأول من الدودة القارضة ودودة ورق القطن والتوتا ابسولوتا على معظم محاصيل الخضر والبقول.
زيادة عدد اجيال التربس والعنكبوت الأحمر وخاصة على الفراولة والباذنجان والفلفل والبصل والقمح (التربس).
ظهور مبكر للجيل الأول من حشرة من الخوخ الأخضر على البطاطس الصيفية (ام المشاكل للبطاطس وعلاقتها بفيرس التفاف الاوراق) ..
زيادة نشاط الذبابة البيضاء – على الطماطم والفلفل والبطاطس وأيضا "نطاطات الاوراق" .
- فراشة الياسمين او دودة براعم الزيتون الخضراء ودي اشتغلت شوية خلال الفترة اللى فاتت وخاصة فى الساحل الشمالى الغربي .. ودخولها الموسم ده هيكون "كتير" .
والظاهرة اللى محتاجة اهتمام وحرص كبير جدا هي هذا الانتشار للحلم الدودي (الايروفي) على كثير من المحاصيل وخاصة الفلفل والطماطم والفول البلدي و على الزيتون.... وده الظروف السابقة تناسبه جداً .
ثالثاً: التأثير على الامراض ودي بقه ركز يا سيدي
ظروف مناسبة لظهور مرض الصدأ الاصفر علي الأصناف الحساسة للقمح ( جميزة 11 ومصر 1) ثم ينتشر علي باقي الأصناف في الدلتا لو لم تتخذ إجراءات محاصرة ظهور أي بؤرة مهما كانت صغيرة او محدودة .
على البصل بياض زغبي ولطعة ارجوانية .
تبقعات أوراق واعفان ثمار على الطماطم والفلفل والفراولة وقرون الفول البلدي ..وخصوصا الالترناري والبكتيري والبوترايتس طبعاً.
لفحة الساق الصمغية على الفرعيات .
بياض دقيقي على المانجو في كثير من المناطق وعلى شيح البابونج ( الفيوم وبني سويف ) ..
اعفان الجذور وموت البادرات على الباذنجان والطماطم اللى لسه مشتولة فى الحقل المكشوف او البطيخ والخيار فى الانفاق او الصوب .
ويقابل ده ان معظم المحاصيل المنزرعة هي:
أما في نهاية عمرها أو فى التلت الاخير من عمرها وهي المحاصيل الشتوية (بطاطس شتوي – بنجر – فول بلدي – خرشوف – بسلة – الشمر – شيح البابونج – الثوم – البصل المبكر (السبعيني فى الصعيد)).
أو فى نصف عمرها زي (القمح – الباذنجان – الفلفل – البطاطس الصيفية المبكرة (زراعة اول ديسمبر) – البصل الحديث - البرسيم – الفراولة) .
او لسه بتقول يا هادي زي (البطاطس الصيفية المتأخرة – بطيخ الانفاق – كنتالوب الانفاق – طماطم الانفاق ).
او اللى على وشك الزراعة زي الطماطم الصيفية المبكرة او الفاصوليا الصيفي..
او الفاكهة وخصوصا اللى داخلة فى تزهير مبكر او حتي عادي (المانجو - الزيتون - النخيل - المتساقطات المبكرة) .
الدكتور محمد علي فهيم رئيس مركز معلومات المناخ مركز البحوث الزراعية
