انهاردة اول أمشير 1740 ،يبدأ شهر أمشير يوم 8 فبراير ويمتد 30 يوما تنتهي يوم 9 مارس القادم وهو الشهر السادس من التقويم القبطي، واستمد أمشير إسمه من "مجير" رمز الريح لدى قدماء المصريين .

وبنهاية شهر أمشير تبدأ الأحوال الجوية في التحسن، ويأتي من بعده برمهات فصل النماء عند قدماء المصريين الذي ينحسر فيه فيضان النيل وتنمو المحاصيل.

طب ايه حكاية امشير .

 أمشير يفصص الجسم نسير نسير ( شدة العواصف )
أمشير أبو الزعابير الكتير ياخد العجوزة ويطير.
لإسم لأمشير  والفعل لطوبة بسبب البرد الكتير
أمشير يقول للزرع سير سير  بلا تعسير
امشير يخلى الزرع يسير والصغير يحصل الكبير (نمو القمح والبرسيم والفول وغيرهم)
 أمشير أبو الزعابير الكتير أبو الطبل الكبير  
أمشير أبو الزعابير الكتير ، ياخد الهدمة ويطير  
أمشير يخللي العجوزة تقيد الحصير (يعني تربطه عشان ما يطيرش) . 
 إذا هل أمشير  إعجن  من البير  .
 أمشير يقول لبرمهات عشرة منى خد ، وعشرة منك هات (يعنى شوية برد على شوية دفا)

 امشير قسمه الفلاح القديم لعشرات : 

العشرة الأولى سماها "مشير" وبيقولوا عليها عشرة الغنام اللي هو راعى الغنم عشان بداية الدفا بتخلليه يبتدي يسرح بالغنم والحقيقة انه بينخدع بالدفا عشان بيرجع بعده برد تاني.. 

 العشرة التانية سماها "مشرشر" أو عشرة المعيز عشان بيرجع يشتد فيها البرد وبيبقى في هوا ومطر وده بيخللي المعيز تموت 

 العشرة التالتة سماها "شراشر" وبيقولوا عليها عشرة العجوز عشان كبار السن يرجعوا يتحركوا تاني بعد رجوع الدفا .

طب بالنسبة للزرع  .

 أمشير الفرصة الأخيرة لكتير من المحاصيل:

 بعد أمشير مفيش تزهير ( الفول والقمح والكمون والبسلة وبعض أشجار الفاكهة.... الخ).
 في أمشير الري هيكون بحساب ومتابعة مع هبات الرياح للقمح والشمر وخلافه .
في أمشير الكل يجهز حاله لاشجار المانجو والزيتون والمتساقطات..
في أمشير يتم الانتهاء من زراعة العروة الصيفية المبكرة ( الفاصوليا والطماطم والفلفل والباذنجان وغيرها) .. 

 في أمشير هتبدأ المحاصيل الأرضية ( بطاطس – ثوم – بصل – بنجر) في التحجيم السريع ( يعني مركبات البوتاسيوم تكون جاهزة)...  
** في أمشير هتزيد الإصابات الحشرية والمرضية لكثير من المحاصيل .




الدكتور محمد على فهيم  رئيس مركز معلومات المناخ مركز البحوث الزراعية