مع نهاية الأسبوع الأول من شهر كهيك تحذيرات يتبعها توصيات  ،في ظل التدرج فى انخفاض الحرارة ليلاً خلال هذه الفترة وجب علينا ان نستجيب للتحذيرات وونفذ التوصيات التالية :




1- القمح: لو هتزرع متأخر انجز اليومين دول وعليك بأصناف مصر 4 ومصر 3 وسدس 14 وسخا 95  ومتأخرش رية التشتية عن 20- 25 يوم .

2- البنجر عروة أغسطس: محدش يصرف في البوتاسيوم للبنجر اكبر من ١٤٠ يوم زيادة عن اللزوم .. ويرش بورون ١٤ ٪ مرتين .. عشان موضوع السكر الكاذب.

3- البطاطس الشتوي: محدش يضيف اي منظمات نمو البطاطس بعد ٩٠ يوم عشان التحجيم .. فقط البوتاسيوم والكالسيوم.

4- البطاطس الصيفي: محدش يروي البطاطس مرتين ورا بعض بدون عزيق لاي سبب .. وممنوع استخدام اليوريا والدفعة الأولي من التسميد يفضل أن تكون ٣ سلفات نشادر مع ٢ نترات نشادر بنظام خط وخط.. استخدام اليوريا بكثرة بيسبب أنها في سنوات اللفحة بتبدأ من الأرض دي أو زيادة تشقق الدرنات في الأصناف الحساسة أو زيادة الإصابة بالمن ... الخ




5- الفراولة: ممنوع الرش بالاحماض الامينية تماما .. دي فترة العفن الرمادي وخاصة بعد انتهاء موجة البرد وزيادة الندي.

6- الزيتون: انجز خدمتك الشتوية والتقليم وافتح قلب الشجرة للجهة البحرية ..وانجز بالكتير علي نهاية الاسبوع .

7-  البسلة والفول: محدش يرش اي نحاسيات دلوقتي أثناء التزهير والعقد .

8-  البصل الفتيل: متستعجلوش الرش المكثف علي البصل .. استنو بعد إجراء الرية الأولي.

9- الثوم: متستعجلوش رش الكالسيوم بورون دلوقتي ... وخليك في البوتاسيوم فوسفيت والماغنسيوم فوسفيت شوية .




10- الخرشوف: اللي لازق وبيأخر الجمع قوي والورق بتاعه أبيض .. ما ترشوش اي احماض امينية أو منشطات .. فقط كالسيوم فوسفيت وسترات بوتاسيوم...

11- القمح: ممنوع استخدام مبيدات الحشائش في العمر اكبر من ٤٠ يوم ... ويمكن استخدام  على سبيل المثال مبيد هربينو ٢٥٠ سم لـ ٢٠٠ لتر ماء فدان للزمير .. وللعريضة مبيد جرناري .

12- البرسيم: محدش يأخر الحشة الحالية واخلصو من الوش ده بدري عشان النبات يفوق بعد موجة البرد مع إضافة حامض فسفوريك مع الرية اللي جاية ٧ لتر.




13- العنب المبكر – متطولشي الفترة ما بين التقليم والرش بكاسرات السكون ... وبعد شوية لما العيون تبدأ تتفتح رش بالكبريت الميكروني عالطول .

14-  مزارع المواشي: محدش يزود من التغذية علي برسيم اليومين دول عشان نقص الفسفور علي المواشي وظهور البول المدمل.

15- مزارع الأمهات السمكية: محدش يغير المياه العميقة بتاعة الأحواض تحت البلاستيك ويكتفي بتغيير المياه السطحية بس مع تكثيف حمامات المضادات الحيوية.