زراعة البنجر  الوصايا العشرة يا بتوع البنجر  لية نسبة السكر عندك بتقل و ازاى ترفعها ,كل مازرعت بدرى كل ماكان البنجر بينمو فى ايام البرد السكر هيزيد .. يبقى الحل بكر الزراعة على قد ما تقدر.
 طول ما انت عمال تديها يوريا و نترات رغم ان ارضك تقيلة وسودة و طينية كل ما دة اثر على نسبة السكر و وداه فى داهية

طيب يبقى ايه الحل ؟

اهدى شوية اوعى تكتر عن ٨٠ وحدة للى ارضه طينيه قديمه حاول تخلصهم خلال اول تسعين يوم تعمل فيهم مجموع خضرى حلو و الـ ٩٠ يوم التانيين صب و تحسن سكر .


 الرى الى عمال على بطال و خاصة لو بتروى بحارى .. يا سلام لو عند بير ارتوازى و تخلط منه مع مية النيل و انت بتروى هتاخد أحسن سكر .. لية ؟ عشان عمنا البنجر بيستفيد من الصوديوم و يحسن بيه عملية الاستخلاص .

خدعوك فقالوا ارمى بوتاسيوم كتير عشان الحجم ... غلط جدا .. كل اللى انت عاوز من البوتاسيوم يا دوب ٢٥ وحدة ممكن توصل لــ ٣٠ وحدة مش هتضر .



البورون يا كبير اكتر حاجة بيحبها و يستهلكها البنجر  ويخلى السكر فى العلالى عاوز منه فى حدود ٢ لتر من بورون محترم اوعى تسترخص و تجيب من ابو بلاش أو حد من ايام الهجرة يقولك حط بوراكس .. أوعى .. البورون لازم  يكون سائل و ١٥.٥ %  رشهم على ٣ مرات ٦٥ يوم و ٩٠ يوم و ١١٠ يوم .

الصنف مهم جدا لان فيه اصناف سكرها بيزيد و اصناف عادية فلازم تطلب الصنف المناسب .


تخيل مسافات الزراعة بين الجور مهم و يقولولك يا جدع  وسع عشان تاخد حجم ... غلط .. زود اعداد النباتات فى الفدان و يبقى الحجم متقارب و متناسق انت عاوز انتاجية و سكر مش واحدة منهم  ..

اخر حاجة يامحترم ضبط المية و تقليلها خلال اخر ٢٥ يوم من عمر البنجر عشان يركز سكر



البنجر لو لقى راحة و رحرحة فى المية و التسميد النيتروجينى و  اتكسعم بوتاسيوم صدقنى السكر هينزل جدا ..

اخر حاجة يأستاذ الاساتيذ اوعى تسيب بنجرك من غير توريد بعد تقطيشه و ترمية على السكة باليومين و الواد المندوب يقولك سيبة يجف السكر يتحسن  ، بيضحك عليك .. هوة مش لاقى عربيات نقل أو المصنع عطلان وورطك فى التقليع و انت كمان بتكون مستعجل  عشان الزرعة اللى بعدية  ، اهدى يا عمنا على زرعك اللى تعبت فية و سلمة كويس ،  ومننساش ان انتاج عالي = ارباح كتيرة.

 

الدكتور  صادق الشيمى  ،  استاذ وقاية النبات  بمركز البحوث الزراعي