عوامل انتشار القواقع بشكل كبير ، اول واهم سبب عندك هو اهمالك  في مكافحه الحشائش اللي فى ارضك وخاصة هنا فى مزارع الفاكهة والموالح 
انتا بتركك للحشائش بالاخص المعمرة من غير عزيق انا عمالت بئيه صالحة جدا للقواقع وانها تاخد راحتها وتتاكثر ودا من خلال ان الحشائش وفرت للقواقع اهم حاجه تعيش بيها الا وهي الضل والرطوبة 


والكلام دا مش للقواقع فقد انتا سمحت للحشايش دي انها تكون عائل عندك ف الارض لكتير من الامراض وبالاخص الحشريه وحضرتك تيجي تشتكي بعد كدا وتقول انا رشيت كذا وكذا والمشكله لسه موجوده ما دا يغالي عشان انتا عندك منبع للحشرات ف قلب الارض ف حضرتك مستني ازاي نتيجه مظبوطة
غير دا كلو خد عندك المصيبه ان كل فتره بتعدي من غير عزيق ومكافحه انتا بيتعمل عندك ف قلب ارضك منبع لتقاوي الحشائش كل واحده بتكمل دوره حياتها وتعمل تقاوي جديده وهكذا فانتا خلاص عايز تكافح حشائش بس مش عارف تيجي تعزق تلاقي الحشائش بتطلع اكتر واكتر ما دا كلو بسببك معلش انتا لو كنت بتكافح اول باول مكنش هيكون عندك كميه التقاوي دي 


فيا سادة خدو بالكو من النقطه دي جدا خاااااصه بتوع اشجار الفاكهة وبالاخص تاني بتوع الموالح
الاسراف فى عمليات الري والزياده المتكرره للرطوبه الزائده وبخاصه الناس اللي شغال بنظام الري بالبشابير دول والري المحوري
عدم الاهتمام بالخدمه الصيحيحه من حيث حرت الارض جيدا وانك تسيبها تتشمس فتره كويسه فكره التشميس بالاخص للاراضي السمره بتقللك نسب حاجات كتيره جدا زي الاعفان والقواقع والنيماتودا والديدان القارضه وتعتبر عملية ببلاش محتاجة شوية صبر فقط
دول كانو اكتر الاسباب المنتشره غير اسباب تانية كتير لكن مش هتهمك قوي زي نقل التربة المصابة فعليا ببيض القواقع ونقل البوص من علي ضفاف الترع للاراضي الزراعيه وهكذا
دورة الحياة القواقع والبزاقات حيوانات خنثويه ولكن لابد من تقابل حيوانين معا لكي يحدث الاخصاب ويتم تبادل الحيوانات المنوية فيما بينهما وغالبا بتحصل عمليه التزاوج دي ف فصل الخريف والربيع بعد عمليه الاخصاب دي كل حيوان بيقوم بعمل حفره علي سطح التربه المفككه تقريبا عمقها خمسه سم وبيتم وضع فيها البيض وبتم خلال الخريف وعشان كدا ف خدمه اشجار الفاكهه ف الخريف وقبل الشتاء بننصح بالعزيق ف الفتره دي


المهم خليني اكملك الحكايه كل قوقع يسيدي بيحط ف المره الواحد تقريبا ١٠٠ بيضه باختلاف الانوع بقا 
وبعد حوالي من ١٠_١٢ يوم بيفقس البيض دا الكلام دا تقريبا ف اخر الخريف بعد الفقس الصغار لولا بيتغذو علي قشره البيضه بعد كدا بيتوجهو للتغذي علي الشعيرات الجذريه والماده الدوبالايه الموجوده ف التربه وبتستمر يالنضوج فتره من ١٠_١٢ شهر قول سنه تقريبا وترجع تعيد الكره تاني انتا متخيل بقا يصديقي انا القوقع الواحد بيعيش تلات سنين وممكن يتزاوج مره واحده ف السنه او اكتر يعني القوقع ف دوره حياتو ممكن ينتج اكتر من 300 قوقع جديد

فتره نشاط القواقع

القواقع بطبيعتها حيوانات ليلية النشاط وبتفضل قوي درجه الحراره المعتدله والرطوبه العاليه وعشان كدا اكتر محافظات منتشر فيها القواقع هي الوجه البحري  واطول موسم لنشاطها هو موسم الربيع ثم الخريف .
المهم هنستفاد من كدا  اننا هنحدد انسب ميعاد مكافحه للقواقع ،  اللي هو هيكون بليل طب انا دلوقتي لو عايز اكافح اكيد مش هينفع بليل هعمل ايه  ،  هقولك سواء انتا كنت هتعمل ايه خلي شغلك كلو بعد العصر وقبل المغرب تقريبا . 
 الدكتور صادق الشيمى أستاذ وقاية النباتات  بمركز البحوث الزراعية


تابع موقع اجرى نيوز عبر تطبيق (جوجل نيوز) اضغط هــــــــنا

اجرى نيوز ، موقع إخباري  يقدم أهم الأحداث المحلية والعربية والعالمية وخدمات صحفية محترفة في الأخبار والاقتصاد والزراعة والعلوم والفنون والرياضة والمنوعات، وهدفنا أن نصل لقرائنا الأعزاء بالخبر الأدق بما يليق بقواعد وقيم الأسرة المصرية.

لذلك نقدم لكم مجموعة كبيرة من الأخبار المتنوعة داخل الأقسام التالية، اخبار مصر ، اخبار الزراعة ، صناعة الدواجن ،الثروة الحيوانية، بنوك واقتصاد ،اجرى لايف ،مقالات ،منوعات، وخدمات مثل سعر الدولار، سعر الذهب، سعر الفضة، سعر اليورو، سعر العملات الأجنبية، سعر العملات المحلية.