موضوع مهم جدا ويشغل بال العديد من الأمهات، خصوصًا اللّي عندهم أطفال بيعانوا من صعوبة في الرضاعة.

إيه هو اللسان الشابك؟ وكيف بيأثر على الرضاعة؟

- اللسان الشابك هو أحد العيوب الخلقية اللي ممكن يتولد بيها الطفل.

- هل بيأثر على الرضاعة؟

بالطبع بيأثر، والتأثير بيختلف حسب درجة الربط اللي في اللسان.
- في بعض الحالات، بيكون التأثير خفيف جدًا وغير ملحوظ (لو درجة الربط بسيطة).
- وفي حالات تانية، بيكون التأثير كبير جدًا ومعقد (لو درجة الربط كبيرة).

في بعض الأحيان، ممكن يوصل الموضوع لدرجة إن الطفل مش قادر يرضع خالص، أو بيواجه صعوبة كبيرة أثناء الرضاعة، لدرجة إنه يسيب صدر الأم ويرفضه أو يضغط على الحلمة بشكل مبالغ فيه، وده بيعمل ألم شديد للأم، وفي بعض الأحيان بيؤدي إلى تشققات في الحلمة.

وأحيانا، الطفل ممكن يشرق أثناء الرضاعة نتيجة صعوبة البلع.

هل في أعراض تانية؟

أكيد... لو الطفل كبر شوية وما أخذناش بالنا من الموضوع في مرحلة الرضاعة، الموضوع ممكن يأثر على نطق بعض الحروف زي اللام أو الراء، لأن دي الحروف اللي بتحتاج حركة لسان بحرية.

علاج اللسان الشابك؟

بمجرد اكتشاف المشكلة، لازم نبدأ نتحرك ونتعامل معاها بعد تقييمها.

الموضوع في الحقيقة بسيط جدا، خاصة للأطفال الصغار (من يوم لحد 6 شهور). ممكن نعمل فك للسان في العيادة باستخدام بنج موضعي.

لكن لو الطفل كبر شوية، بنفضل إننا نعمل العملية في المستشفى علشان الطفل ما يحسش بأي ألم، ولأننا نقدر نفك اللسان بشكل جيد.

بعد العملية؟

نحتاج لمضاد حيوي ومسكن مناسب للطفل، بالإضافة لبعض التمرينات اللي بنشرحها للأم عن طريق فيديوهات تسهل عليها الفهم وتبسط الموضوع.

الدكتور أحمد سلامة - أستاذ مساعد بقسم جراحه الأطفال - كليه الطب - جامعه الازهر