عمرك سمعت الجملة دي قبل كده؟

كتير مننا بيفكر إن الكحة اللي بتطوّل مع الوقت بتتحول لحساسية، لكن الحقيقة غير كده، الكحة في حد ذاتها مش بتتحول لحساسية، إنما اللي بيحصل إن فيه ناس جسمها بيكون حساس بطبيعته، ولما بيتعرضوا لنزلات البرد أو السعال، مناعتهم بتضعف، فبتبدأ أعراض الحساسية اللي عندهم تظهر أو تزيد.

إيه هي حساسية الصدر؟

حساسية الصدر معناها إن الشعب الهوائية بتكون ضيقة بسبب التعرض لحاجة بتسبب تهيج، وده بيؤدي لالتهاب في جدار الشعب الهوائية، وتورمها، وإفراز كميات كبيرة من المخاط، وده اللي بيخلي الشخص يحس بنوبات ضيق تنفس وسعال مزمن، وبتزيد الأعراض بالليل أو مع الفجر.

كمان الجهاز التنفسي عند مريض الحساسية بيتأثر بعوامل كتير زي بعض الأطعمة، مكسبات الطعم، التغيرات الجوية، الأتربة، الروائح القوية، أو حتى الإصابة بأمراض فيروسية زي البرد.

أعراض حساسية الصدر

- صعوبة في التنفس
- كحة مستمرة
- صوت صفير في الصدر وقت التنفس
- زيادة في معدل التنفس
- وجع في الصدر
- سعال شديد بعد الضحك
- صعوبة في الكلام بسبب الكحة
- سيلان في الأنف
- زرقة في الشفايف
- احمرار في العين

الأعراض دي بتظهر عند الكبار، لكن عند الأطفال بتكون واضحة أكتر في شكل سيلان مستمر للأنف وكحة جافة بتزيد مع المجهود وبالليل، وبتستمر لفترة طويلة أكتر من 3 أسابيع.

نصيحة

لو الكحة عندك بقت مزمنة أو لاحظت إنك بتتعرض لنوبات ضيق تنفس، الأفضل تستشير دكتور مختص عشان تاخد العلاج المناسب قبل ما الحالة تتفاقم.

أ.د أحمد بشير - أستاذ الأمراض الصدرية جامعة الأزهر