ينشر موقع "اجري نيوز" الإخباري عدة معلومات للمهتمين بالقطاع الزراعي حول الري في زراعة الاصص من حيث الري الكامل والغير كامل . 

الري الكامل 

وهو الطريقة الصحيحة لري الاصص، وفيه بنسقي الاصيص لحد ما تربة الاصيص تتشبع بالكامل بالماء.

 وعلامة تشبع التربة بالكامل بالماء هي خروج قطرات من الماء من فتحات صرف الاصيص.

الري غير الكامل

ودي طريقه خاطئة لري الاصص، وفيها بيتم وضع كميات قليله من الماء لتربة الاصيص وعلي فترات متقاربه، ممكن تكون مره كل يوم والطريقة دي ليها اضرار ومشاكل كبيره .

اضرار ومشاكل طريقة الري غير الكامل 

١- الري غير الكامل بيكون بكميات قليله علي سطح التربة وبالتالي التربة مش بتتشبع بالماء ، والماء بيسقي الجذور السطحية فقط، لكن مش بيوصل للجذور العميقه ولا الجذور الرئيسية اللي بتكون في قاع تربة الاصيص ، وبالتالي بتبدأ الجذور دي تموت، والافرع اللي بتغذيها الجذور دي بتموت .

٢- مياه الري بتزيح الاملاح قدامها، فلو سقينا ري كامل فجزء كبير من الاملاح بيطلع مع كمية المياه اللي بتخرج من فتحات صرف الاصيص كل مره انما في الري غير الكامل المياه بتزيح الاملاح قدامها لتحت مستوي المياه، ولان المياه مش بتخرج من الاصيص فبتبدأ الاملاح تترسب في طبقات التربة اللي تحت المستوي اللي بتوصله مياه الري، وتبدأ الاملاح تتراكم مع تكرار الري غير الكامل لحد ما تعمل عندك طبقه ملحيه فالتربة قادره علي قتل الجذور والنبات 

٣- التسميد بيوصل للاماكن اللي بيوصلها ماء الري، لذلك فان طريقة الري غير كامل تتسبب في عدم تسميد الجذور العميقه والرئيسيه، بسبب عدم وصول ماء الري ليها 

٤ -اللي بيقوم بالري غير الكامل غالبا بيسقي النباتات علي فترات متقاربه ظناً منه انه بيعوض قلة الري بزيادة عدد مرات الري ، لذلك فغالبا الري غير الكامل بيتم بينما الجزء السطحي من التربه بيكون رطب بالماء ، وتكرار الري والجزء العلوي رطب بيتسبب مع الوقت بحدوث اعفان فالتربه واختناق للجذور السطحيه ، كما ان التربه الرطبه بشكل دائم بتكون بيئه خصبه لنمو البكتيريا والفطريات التي تصيب النبات بامراض فطريه .


- في ناس هتقولك انا بسقي ري غير كامل ومع ذلك نباتاتي كويسه احب اقولك متقلقش، تأثير الموضوع ده بيبان مع الوقت، يعني ان عاجلاً او آجلاً تأثيرهم هيبان عالنبات، فألحق نباتك

- في ناس عندها تربة الاصيص سيئة ومش بتمتص مياه الري بشكل كويس والمياه بتنزل من الشقوق وتخرج مباشرة من فتحات صرف الاصيص، فبيضطروا يسقوا الاصيص نقطه نقطه، وبيظن ان دي طريقة ري بالتنقيط، و ده طبعا كلام مش صحيح، انتا بتستخدم طريقة الري بكميات قليله علشان تحل مشكلة تكوين التربة السيء اللي استخدمته فالزراعة .

-الطريقة دي صحيحه علشان نحل مشكلة عدم تشبع التربة بالماء لكن يفضل حل المشكلة دي بمعالجة التربة وتغيير تكوينها عشان تتشرب الماء مباشرة .