عشان تظبط درجة الحرارة بحيث تكون مناسبة لاستقبال الكتاكيت ف انت محتاج تقيس درجتين حراره وتتأكد انهم مظبوطين:

 اولا

درجة حرارة جو العنبر وتلك اللي اغلب الناس بتهتم بيها.

 ثانيا: درجة حرارة الفرشه :

ودي اغلب الناس مش بتهتم بيها علي الرغم انها مهمه جدا ومن المفترض الا تقل عن 28 درجة لان لو درجة حرارة الفرشه اقل من كده هتحس الكتاكيت بالبروده حتي لو درجة حرارة جو العنبر مظبوطة ودى اللى عاوزين نتكلم عنها. 

تقيس درجة حرارة الفرشه ازاي

بتحط ترمومتر علي عمق 1سم من سطح الفرشه وبتسيبه من ٣-٥ دقايق وبعدين تشوف القراءة كام القراءه دي هي درجة حرارة الفرشه. 
 
من الممكن معرفة اذا ما كانت الفرشة باردة ولا دافئة ببساطة وبدون قياس حرارتها من خلال اخذ عينة عشوائية من الكتاكيت بعد نزول الكتاكيت ب 6 ساعات وتحط راحة القدم على خدك, ان كانت دافئة يبقى الفرشة دافئة وان كانت باردة يبقى الفرشة باردة ( foot pad test ) 

 لو الفرشة باردة ايه اللى يحصل ؟ 

١-الكتاكيت هتتجمع حوالين الدفايات او في احد جوانب العنبر وهتمتنع عن الاكل والشرب على الرغم من ان حرارة جو العنبر مظبوطة وناس كتير احيانا بتشك ان الترمومترات فيها مشكلة. 

٢-الامتناع عن الاكل والشرب في الفترة الحساسة دى من عمر الكتكوت هيأثر علي نمو وتطور الجهاز الهضمي وسلامة الامعاء وهيقلل نشاط مركز الشهيه في المخ وهنلاقي الفراخ اكلها ووزنها اقل من الطبيعي طول الدورة.

٣-هيأثر علي نمو وتطور الجهاز المناعي وامتصاص كيس المح وهتكون الفراخ ضعيفه مناعيا  واكثر عرضه للاصابه بالامراض.

٤-هيكون التجانس وحش والصردة عاليه. 

٥-هتزود الاستسقاء بعد كده ف الدوره بمعدل ٣ اضعاف وهتزود النافق من الاستسقاء للضعف.

نصائح مهمة لازم تخلي بالك منها 

 1- لازم تدفي العنبر قبل وصول الكتاكيت بفتره كافيه ( حوالى 12 ساعة) لحد ما تكون درجة حرارة الفرشه ٢٨ درجه علي الاقل.  

 2 - بلاش تستخدم فرشه مبتله في الشتاء لأنها بتكون دايما حرارتها اقل من درجة حرارة العنبر ب ٥ : ١٠درجات وبالتالي صعب توصل لدرجة الحرارة المظبوطه للفرشة دا طبعا غير انها ممكن تسبب مشاكل صحية تانية زى الاسبرجيلوس.  

لو حصل تجمع للكتاكيت بسبب برودة الفرشة :

ارفع درجة حرارة العنبر شويه لحد ما الكتاكيت تفرد وبعدين نزلها تاني للطبيعي, لكن ده مش الصح المطلق ولكن هو ادارة للازمة فقط  والصح هو التدفئة قبل وصول الكتاكيت بفترة كافية ولو قلقان من تكلفة التدفئة فلك ان تعلم ان الفلوس اللى بتوفرها فى الوقود اقل بكتير من اللى بتخسرها بسبب برودة الكتاكيت. 

نقطة اخيرة خلى بالك منها : احيانا بتتجمع الكتاكيت تحت مصدر التدفئه في بعض الأمراض زي السالمونيلا وفى الحالة دى يلزم تدخل علاجى.