التغذية السليمة مش بس للنمو، لكن كمان عامل أساسي في حماية الدواجن من الأمراض المعدية والميكروبات اللي ممكن تأثر على صحتها وإنتاجها، وعشان كدا، موقع "اجري نيوز" الاخباري، بيقدم مجموعة من العناصر الغذائية اللي بتقوي جهاز المناعة عند الطيور،

وهى كالتالي:
- البروتينات والأحماض الأمينية:

مش بس بتساعد في بناء العضلات والأنسجة، ولكن هي كمان أساس في تكوين الأجسام المضادة اللي بتحمي الطائر وقت التعرض للعدوى، زي الأرجنين والليسين والميثيونين.

- الدهون (الأحماض الدهنية):

مش مجرد مصدر طاقة، لكنها كمان ليها دور مهم في تعزيز مناعة الدواجن أو الطيور في العموم من خلال تحسين الاتصال بين الخلايا ونقل الإشارات اللي بتنظم الوظائف الحيوية، ومن أهمها حمض اللينوليك واللينولينك والاراكيدونيك.

- المعادن الأساسية للمناعة:

- السيلينيوم: بيعزز المناعة وبيحمي خلايا الجسم من التلف، وإضافته للعلف بيساعد على تقوية الطائر وزيادة مقاومته للأمراض.

- النحاس: بيساعد في تقوية الأعضاء المهمة زي الكبد والقلب والطحال، ونقصه ممكن يأثر على صحة الجهاز العصبي والدورة الدموية.

- الزنك: بينشط كرات الدم البيضاء وبيحسن الاستجابة المناعية، ونقصه بيضعف المناعة بشكل واضح.

- الكوبالت: مهم لإنتاج خلايا الدم الحمراء والحفاظ على صحة الأعصاب، وكمان بيساعد في تكوين فيتامين ب12 اللي بيرفع مناعة الطائر.

- الفيتامينات: وهى ليها دور كبير في تقوية المناعة، لأنها بتساعد في تنشيط كرات الدم البيضاء والخلايا الليمفاوية، وكمان بتشتغل كمضادات أكسدة بتقضي على الشوارد الحرة، ومن أهمها: فيتامين (أ، هـ، ب12، ب6، ج).