ينشر  موقع "اجرى نيوز"، الإخباري معلومات ونصائح من قبل قسم بحوث تربية الدواجن التابع لمعهد بحوث الإنتاج الحيواني ..مركز البحوث الزراعية - وزارة الزراعة، حول أسباب المشاكل المرضية للدواجن فى الشتاء وطرق الوقاية  .

اكتر فترة بيحصل فيها مشاكل مرضية خصوصا فى الشتاء هي الفترة بعد عمر ٢١ يوم وحتى عمر ٢٨ يوم لعدة أسباب جوهرية أهمها 

١- انخفاض المناعة الامية اللي بتحمى الكتاكيت خلال اول عمر ١٤ - ٢١ يوم دون تكوين مناعة من التحصينات كافية للحماية وده بيسبب حدوث فجوة مناعية خلال الفترة دي بيدخل خلالها الامراض.

٢- تغيير نوع العلف من بادى لنامي وده بيكون مصحوب بتغير فى الخواص الكيمائية والفيزيائية للعلف ..
و بالتالي بيحصل خلل فى التوازن الميكروبي و بيخلي البكتيريا الضارة تتفوق على البكتيريا النافعة وبكدة بتقل المناعة الموضعية للجهاز الهضمي فى مقاومة الامراض وكمان بيعمل بعض الاجهاد على الطيور .. وده بدوره بيضعف المناعة.

٣- تغيير كسوة الفراخ من الزغب الى الريش وده بيسبب اجهاد على الطيور وكمان بيخلي عزل الحرارة ضعيف وبتكون الفراخ حساسة جدا خصوصا لانخفاض حرارة العنبر .

 بعد 28 يوم بتقل حساسية الطيور للبرودة لان الريش بيكون اكثر تطورا وكمان بتتكون درجة مقبولة من المناعة المكتسبة اللي بيكونها الجهاز المناعي للطيور وبالتالي بتقل الى حد ما قابلية الطيور للإصابة بالأمراض ...
و علشان كدة لو مر الأسبوع ده بدون مشاكل... يبقى بنسبة كبيرة الدورة مرت على خير .

 لتفادى وتقليل المشاكل خلال الفترة دي 

١- تجهيز الفراخ بالتحصينات المناسبة وفى الوقت المناسب لتوفير اقصى درجة حماية ممكنة خلال الفترة دي ولتجنب تكوين فترة فراغ مناعي
٢- تغيير العلف من بادى لنامي يكون تدريجي (الاحلال بالثلث).
٣- استبعاد أي فراخ ضعيفة او تحت الوزن على عمر٢١ يوم وحطها فى حاجز مستقل. 
٤- تجنب الإجراءات الطبية العنيفة زي التحصين او الحقن خلال الفترة دي.
٥- استخدام جرعة بروبيوتك مع تغيير العلف لإعادة التوازن الميكروبي للأمعاء. 
٦- ظبط ظروف التربية من حرارة ورطوبة وفرشة لتقليل الاجهاد على الطيور.
٧- وضع برنامج امان حيوي قوى يضمن عدم دخول أي معدات او سيارات بدون تطهير مناسب او اشخاص قد تكون مصدر للعدوى.
٨- عدم الاسراف فى استخدام المضادات الحيوية وخصوصا المثبطة للجهاز المناعي خلال الفترة دي الا بتوصية طبية. 
٩- اختيار علف جيد يكون خالي من السموم الفطرية وتخزينه بشكل جيد.
١٠- المتابعة الجيدة للمزرعة و ابلاغ طبيبك المشرف باي تغير فى الحالة الصحية العامة لإعطاء الفرصة للتشخيص المبكر والعلاج السريع لأى حالة مرضية قبل تفاقمها.


تابع موقع اجرى نيوز عبر تطبيق (جوجل نيوز) اضغط  هــــــــنا

اجرى نيوز ، موقع إخباري  يقدم أهم الأحداث المحلية والعربية والعالمية وخدمات صحفية محترفة في الأخبار والاقتصاد والزراعة والعلوم والفنون والرياضة والمنوعات ، وهدفنا أن نصل لقرائنا الأعزاء بالخبر الأدق بما يليق بقواعد وقيم الأسرة المصرية.

لذلك نقدم لكم مجموعة كبيرة من الأخبار المتنوعة داخل الأقسام التالية، اخبار مصر، اخبار الزراعة، صناعة الدواجن، الثروة الحيوانية، بنوك واقتصاد، اجرى لايف، مقالات، منوعات، وخدمات مثل سعر الدولار، سعر الذهب، سعر الفضة، سعر اليورو، سعر العملات الأجنبية، سعر العملات المحلية.