ينشر  موقع "اجرى نيوز " الاخبارى معلومات ونصائح من قبل  قسم بحوث تربية الدواجن التابع لمعهد بحوث الانتاج الحيوانى مركز البحوث الزراعية وزارة الزراعة، حول  اسباب  المشاكل المرضية للدواجن فى الشتاء وطرق الوقاية  . 

اكتر فترة بيحصل فيها مشاكل مرضية خصوصا فى الشتاء هى الفترة بعد عمر ٢١ يوم وحتى عمر ٢٨ يوم أهمها:

١- انخفاض المناعة الامية اللى بتحمى الكتاكيت خلال اول عمر ١٤ - ٢١ يوم دون تكوين مناعة من التحصينات كافية للحماية وده بيسبب حدوث فجوة مناعية خلال الفترة دى بيدخل خلالها الامراض.

٢- تغيير نوع العلف من بادى لنامى وده بيكون مصحوب بتغير فى الخواص الكيمائية والفيزيائية للعلف وبالتالى بيحصل خلل فى التوازن الميكروبى وبيخلى البكتيريا الضارة تتفوق على البكتيريا النافعة وبكدة بتقل المناعة الموضعية للجهاز الهضمى فى مقاومة الامراض وكمان بيعمل بعض الاجهاد على الطيور وده بدوره بيضعف المناعة.

٣- تغيير كسوة الفراخ من الزغب الى الريش وده بيسبب اجهاد على الطيور وكمان بيخلى عزل الحرارة ضعيف وبتكون الفراخ حساسة جدا خصوصا لانخفاض حرارة العنبر .

 بعد 28 يوم بتقل حساسية الطيور للبرودة لان الريش بيكون اكثر تطورا وكمان بتتكون درجة مقبولة من المناعة المكتسبة اللى بيكونها الجهاز المناعى للطيور وبالتالى بتقل الى حد ما قابلية الطيور للاصابة بالامراض وعلشان كدة لو مر الاسبوع ده بدون مشاكل يبقى بنسبة كبيرة الدورة مرت على خير .  

 لتفادى وتقليل المشاكل خلال الفترة دى :

١- تجهيز الفراخ بالتحصينات المناسبة وفى الوقت المناسب لتوفير اقصى درجة حماية ممكنة خلال الفترة دى ولتجنب تكوين فترة فراغ مناعى
٢- تغيير العلف من بادى لنامى يكون تدريجى ( الاحلال بالثلث ) 
٣- استبعاد اى فراخ ضعيفة او تحت الوزن على عمر٢١ يوم وحطها فى حاجز مستقل 
٤- تجنب الاجراءات الطبية العنيفة زى التحصين او الحقن خلال الفترة دى 
٥- استخدام جرعة بروبيوتك مع تغيير العلف لاعادة التوازن الميكروبى للامعاء 
٦- ظبط ظروف التربية من حرارة ورطوبة وفرشة لتقليل الاجهاد على الطيور 
٧- وضع برنامج امان حيوى قوى يضمن عدم دخول اى معدات او سيارات بدون تطهير مناسب او اشخاص قد تكون مصدر للعدوى
٨- عدم الاسراف فى استخدام المضادات الحيوية وخصوصا المثبطة للجهاز المناعى خلال الفترة دى الا بتوصية طبية 
٩- اختيار علف جيد يكون خالى من السموم الفطرية وتخزينه بشكل جيد 
١٠- المتابعة الجيدة للمزرعة وابلاغ طبيبك المشرف باى تغير فى الحالة الصحية العامة لاعطاء الفرصة للتشخيص المبكر والعلاج السريع لاى حالة مرضية قبل تفاقمها