ينشر موقع "اجرى نيوز" الإخباري معلومات هامة للمربيين عن تطهير مزارع الدواجن بعد دورة التسمين، من واقع تقارير قسم الدواجن بحوث الإنتاج الحيواني وزارة الزراعة حيث يعتبر أساسي في محاربة الأمراض الفيروسية.

برنامج مكثف للتطهير:

برنامج مكثف للتطهير قد يرى البعض فيه بدائل أخرى ولكن الهدف هو التطهير بالمواد السهلة للمربى الصغير قبل الكبير....يعنى ممكن تستبدل بعض المطهرات بأسماء تجارية أخرى.

المرحلة الأولي:

مرحلة النظافة والغسيل للعنابر ولازم هنا نتكلم عن حاجات معينة أهمها انك قبل شيل السبلة بتديها رشة بملاثيون أو بيوتكس عشان السوس والحشرات الزاحفة تقضى على معظمه، والحاجه الثانية في الغسيل والمطهرات انك لازم تعرف ان لكل مطهر ومنظف مدة لملامسته للسطح اللي هيشتغل عليه يعنى ماتنظفش المزرعة وتغسلها وتشيل المنظف على طول.

التنظيف والغسيل ودى مرحلة تسبق التطهير وهى مهمة جدا جدا  والاهتمام بتشيل السبلة  تحتها، وتشطف المزرعة كويس قوى قوى قوى بحيث ماتسيبش فيها ولا حتة إلا لما تغسلها سقف، أرضية حوائط معدات كل شيء يتغسل بماتور ضغط عالي لإزالة السبلة وأثار الدوة السابقة، بعد الغسيل بتسيب المزرعة تنشف كويس قوى قوى قوى .

المرحلة الثانية:

انك تعمل صيانة للمزرعة من شبابيك – من سلك مانع للحشرات – من سد شقوق في الحوائط.

المرحلة الثالثة:

تغسل بماء وصابون سائل أو منظف جميع أجزاء المزرعة وتسيبها برضه تنشف ...يعنى تسيب الصابون عليها عشان يتفاعل مع المواد العضوية لمدة معينة تتجاوز 3-5ساعات وبعد كده تشطف .

المرحلة التالية هي انك بعد ما تشطف بتسيب المزرعة تنشف وفى اليوم التالي بتبدأ التطهير :

-هتبدأ في الأرضيات بغسيل بفنيك بتركيز 10% ...خلى بالك ان ده للمباني فقط وتترك لليوم التالي .
- هتطهر بكلور بنسبة لا تقل عن 5% وده لكل أجزاء العنبر....وأوعى تنسى تسيبه لتانى يوم .
- هنطهر الأرضيات بصودا كاوية (يعنى لاتلمس معدات ولا أشخاص ) لا يقل تركيزها عن 2% وممكن يزيد حتى 5% ولازم تشتغل فى ماء دافئ وتسيبها عالأرضيات حتى تجف.
-هترش بفورمالين تركيز لا يقل عن 10% لجميع المباني وده مهم جدا جدا جدا ...خصوصا في الفيروسات بس هنا لازم نقول كام ملاحظة عليه، أهمها انك لازم تاخد بالك ان الفورمالين مادة مسرطنة ....خلى بالك خلى بالك منها وجلدك وجسمك  ،  الحاجه التانية عشان تستفيد من كفاءة الفورمالين لازم تدفى العنبر وتقفله عشان يشتغل ....يعنى ارفع درجة الحراة واغلق العنبر لمدة لاتقل عن 18 ساعة .
- هتفتح العنبر وهترش الأرضيات بملاثيون أو بيوتكس عشان الحشرات الزاحفة 
- هترش أرضية العنبر بطبقة جير 
- هتفرش النشارة ويفضل الا تقل عن 8 سم فى الشتاء.
- هترش النشارة بفيركون اس بواقع 10 جرام لكل لتر ماء مستخدم فى التطهير.
- أخر حاجه : هتدخل المعدات كلها وتجيب قوالب تبخير فورمالين وتبخر عنبرك وتقفله حتى قبل استقبال الكتاكيت ب48 ساعة إبدا هوى العنبر  ودفي العنابر لاستقبال الكتاكيت .

بالنسبة للمعدات :

أهم حاجه انك تغسلها كويس قوى بمنظفات – خطوط النبل والمعالف والخلايا نفس الكلام ...هتستخدم مطهرات خاصة بخطوط النبل عشان التكلسات والترسيبات اللي فيه، ما أكثر المطهرات الخاصة بالمعدات والخلايا...ممنوع استعمال أي مطهر بيتبقى أثره في المعدات عشان ما يأثرش على التحصينات الحية في المية.