ينشر موقع "اجرى نيوز" الاخبارى معلومات هامة عن تقليل مخاطر الاصابة بالالتهاب الشعبى " اى بى" اللى بتعانى منه كتير من مزارع الدواجن من خلال توصيات قسم بحوث تربية الدواجن التابع لمعهد بحوث الانتاج الحيوانى مركز البحوث الزراعية وزارة الزراعة.

تقليل مخاطر الاصابة بالالتهاب الشعبى " اى بى":

 
-استعمل عترة التحصين المناسبه لمنطقتك وبلاش اسراف في استخدام التحصينات وماتدخلش عترات مغايرة لمزرعتك الا بتوصيه طبية ..وهي علي كل حال نسبة حمايتها ضعيفه 
-لو عنبرك ليه تاريخ اصابة سابقة بالعترة الكلوية من الآي بي 
-حاول تغير العلف من بادي لنامي بدري شويه لتقليل الحمل علي الكلي 
-ريح الكلى قدر الامكان وابعد عن الادوية المجهدة ليها خصوصا فى عمر الاصابة المتوقع 
-حلل  الاملاح الكلية فى ماء الشرب لو بتستخدم مياة جوفية ( ارتوازى )
-لو عنبرك بتيجي ليه اصابه بدري قبل ٢٠ يوم يبقي تبعد عن اي تحصينات او حقن او ادويه مجهده للمناعه بدءا من عمر ١٥ يوم 
-ابعد عن الإجراءات الطبيه العنيفه زي التحصين او الحقن بعد عمر ٢٠ يوم وحتي عمر ٣٠ يوم الا اذا كانت بتوصيه طبيه
-وضع برنامج قوي ومناسب للجمبورو لان غالبا بتحصل إصابات اي بي بعد التثبيط المناعي الناتج من الجمبورو ف الشتاء
-بلاش تسكن اكتر من عمر داخل نفس الموقع ويفضل اعتماد سياسة (دخول الكل -خروج الكل) لان الفيروس بيتنقل في الهواء لمسافة كيلو تقريبا



-نسق مع جيرانك اللى مزارعهم فى حدود كيلو متر من مزرعتك واتعاملوا كمزرعة واحدة ( نفس نوع الكتكوت - نفس العمر - نفس انواع وعمر التحصينات ) 
-وضع برنامج اداري ودوائي قوي للمحافظه علي صحة وسلامة الجهاز التنفسي لان وجود اي مشاكل تنفسيه بتزود شدة الإصابة وماتسمحش باى ارتفاع او انخفاض اوتذبذب فى الحرارة او التهوية خصوصا اثناء العمر المتوقع للاصابة 
-التخلص التام من السبله قبل عملية التطهير لان الفيروس بيقدر يعيش خارج جسم الطائر في الوقت الحالي من السنه (الخريف) حوالي ١٢ يوم وفي الشتاء حوالي ٥٦ يوم وممكن في السبله لحد ١٠٠ يوم فلازم مايبقاش اي بقايا سبله داخل او حول المزرعه لان الفيروس ده معدي للغاية وحتي اعداد صغيره من جزيئات الفيروس بتكون قادرة علي إحداث عدوي في الدورات التاليه وهنلاقى العنابر اللي بتتصاب بالآي بي بتتكرر معاها الاصابه طول الشتاء .
- ماتزودش كثافة الاسكان عن ٨ للمتر المربع للعنابر المفتوحة و ٢٨ كجم للمتر المربع فى العنابر المغلقة .
-فى حالة ظهور فهقة (حتى لو بسيطة ) او اسهالات جيرية او انخفاض استهلاك العلف او الماء او اى ارتفاع فى النافق بعد عمر 15 يوم ..
- راجع طبيبك المشرف لانها ممكن تكون بداية اصابة بالالتهاب الشعبى ( اى بى )