الكل بيستفسر عن سبب إصابة العجول الرضيعة بالتهاب المفاصل أو ظهور خراج في أكتر من مكان في الجسم، والسبب وراء ده بيكون في الغالب بسبب جرح فسيولوجي بيحدث للعجل عند قطع الحبل السري بعد الولادة، الجرح ده، رغم أنه طبيعي، بيكون مصدر لانتقال العدوى البكتيرية الموجودة في بيئة الولادة.

وعلشان كده، لازم نهتم بنظافة مكان ولادة العجول وتربيتها في بيئة نظيفة، عشان البكتيريا تدخل الجسم عن طريق الجرح وتنتشر في أماكن مختلفة.


ولو العدوى كانت في الحبل السري فقط من غير ما تنتشر، هيتعرض العجل لالتهاب في السرة ويتكون خراج صديدي، والعجل هيتعرض لألم شديد وقد يموت أو ياخد وقت طويل في العلاج، لكن لو الميكروب انتشر للمفاصل، خصوصًا في القدمين، هيسبب التهاب فيها أو خراجات، أو حتى انتشار الخراج في أماكن تانية زي الوجه والقدمين. 

وفي بعض الحالات، ممكن الميكروب يوصل للكبد، وده يؤدي لموت العجل بشكل مفاجئ أو ظهور تشنجات عصبية قبل الوفاة.
كتير من الناس ممكن يتجاهلوا فحص السرة عند الكشف على العجل في أول أسبوع من عمره، وده ممكن يخليهم ما يكتشفوش الإصابة. 

عشان كده، من الضروري فحص السرة فور الولادة ومتابعتها بعناية، لمنع الإصابة بسرعة والكشف عنها في وقت مبكر:

1.اهتم بنظافة مكان ولادة العجول، ويفضل وجود حظيرتين مع تغيير الأرضية بالرمل النظيف وتعرضها للشمس.
2.بعد ولادة العجل، لازم تفرغ السرة من السوائل برفق باستخدام الأصابع وتطهيرها بمحلول يود 7% لمدة 3 أيام.
3.متربطش السرة علشان السوائل تخرج منها طبيعي.
4.لو لاحظت التهاب في المفاصل أو ظهور خراج على العجل، راجع تطهير السرة ومكان الولادة فورًا.
5.لو لاحظت ورم في السرة، اعرض العجل على الطبيب بسرعة قبل تفاقم حالته.

التهابات السرة والمفاصل والخراجات في العجول بيكون دليل على نقص الاهتمام بتطهير السرة ومكان الولادة، ولازم نحرص على النظافة لضمان صحة العجول.